ភ្នំពេញ៖ នៅព្រឹកថ្ងៃទី១៦ ខែតុលា ឆ្នាំ២០២៣ ប្រតិភូកីឡាជនមានពិការភាពកម្ពុជា បានចាកចេញពីកម្ពុជាឆ្ពោះទៅទីក្រុងហាន់ចូវ ប្រទេសចិន ដើម្បីចូលរួមប្រកួតកីឡាអាស៊ីប៉ារ៉ាហ្គេម (ASIAN Para Games) លើកទី៤។

កីឡាករ និងកីឡាការិនីមានពិការភាពកម្ពុជា នឹងចូលរួមប្រកួតលើប្រភេទកីឡាដូចជា អត្តពលកម្ម ហែលទឹក វាយកូនឃ្លីលើតុ បាល់ទះអង្គុយ បាល់បោះជិះរទេះ និងកីឡាវាយសី។ ក្នុងចំណោម ៦ប្រភេទកីឡានេះ គឺមានកីឡាជាក្រុមចំនួន២ គឺក្រុមបាល់ទះអង្គុយ បុរស ៨នាក់ និងកីឡាបាល់បោះជិះរទេះនារី ១២នាក់ ចំណែកឯ ៤ប្រភេទកីឡាទៀត មានអត្តពលិកម្នាក់ៗដូចៗគ្នា។

គូសរំលឹកថា ក្នុងពេលកម្ពុជាជាម្ចាស់ផ្ទះរៀបចំការប្រកួតកីឡាអាស៊ានប៉ារ៉ាហ្គេមនៅខែមិថុនាឆ្នាំ២០២៣ កន្លងមកនេះ កម្ពុជាទទួលបានមេដាយសរុបចំនួន ៧០គ្រឿង ក្នុងនោះមេដាយមាស ៩គ្រឿង មេដាយប្រាក់ ១៨គ្រឿង និងសំរឹទ្ធ ៤៣គ្រឿង ដោយកម្ពុជាឈរនៅចំណាត់ថ្នាក់លេខ៨ លើ ៣ប្រទេស គឺព្រុយណេ ទីម័រខាងកើត និងប្រទេសឡាវ៕